དབྲ་རུ། བཀྲ་ཤིས་དབང་འདུས། ཤེས་བར་དགའ་ཚལ་སློབ་གླིང།
ཕ་ས་དགྲ་ལ་ཤོར་བའི་དུས་ཤིག་ན།།
ཕྱི་ནང་གཉིས་སུ་གྱར་བའི་སྐབས་ཤིག་ན།།
མི་ལོ་ལྔ་བཅུ་འཁོར་བའི་མཚམས་ཤིག་ན།།
མི་རབས་གསར་བའི་དཔའ་བོ་དྭངས་རྩེ་ཞིག།།
སྲིད་འབྱོར་མངའ་ཐང་རྩོད་པའི་དུས་ཤིག་ན།།
མཐུ་ལྡན་དཔུང་སྡེབ་བསྒྲིཊ་པའི་སྐབས་ཤིག་ན།།
ཉམ་ཆུང་བྲན་དུ་ཚུད་པའི་མཚམས་ཤིག་ན།།
རི་བོ་ཕྲག་དུ་འདེགས་ནུས་སྟོབས་ལྡན་ཞིག།།
རིག་པའི་གནས་ལ་བརྩོན་པའི་དུས་ཤིག་ན།།
ང་མཁས་ཁོ་བཟང་སྡུར་བའི་སྐབས་ཤིག་ན།།
གསར་གཏོད་བང་རྩལ་འགྲན་པའི་མཚམས་ཤིག་ན།།
མཁས་པའི་ཡང་རྩེར་སོན་པའི་སློབ་དཔོན་ཞིག།།
གྲུབ་མཐའི་འཐེན་འཁྱེར་རྒོད་པའི་དུས་ཤིག་ན།།
ཆོལ་ཁའི་ཕྱོགས་རིས་ངན་པའི་སྐབས་ཤིག་ན།།
སྤྱི་དོན་ཡལ་ལ་ཉེ་བའི་མཚམས་ཤིག་ན།།
ཆིག་སྦྲིལ་རྩིས་སུ་བཀུར་བའི་སྤྱི་མི་ཞིག།།
འཛམས་གླིང་འགྱུར་ལྡོག་ཆེ་བའི་དུས་ཤིག་ན།།
མང་པོས་རང་དབང་ལེན་པའི་སྐབས་ཤིག་ན།།
གོ་སྐབས་བཟང་པོའང་སྲིད་པའི་མཚམས་ཤིག་ན།།
སྐབས་དང་དུས་ལ་སྟུན་ཤེས་ཐབས་མཁས་ཤིག།།
འགལ་རྐྱེན་བར་ཆད་སྣོ་བའི་དུས་ཤིག་ན།།
དོན་ཆེན་འགག་རྩར་སླེབས་པའི་སྐབས་ཤིག་ན།།
འོས་འགན་རི་ལས་ལྕི་བའི་མཚམས་ཤིག་ན།།
དམ་བཅའ་བྲག་ལས་བརྟན་པའི་ཕོ་རྒོད་ཅིག།།
གོ་ལ་ཆུང་དུ་ཕྱིན་པའི་དུས་ཤིག་ན།།
རྒྱལ་སྤྱིར་འདུ་ཚོཊ་བཟང་བའི་སྐབས་ཤིག་ན།།
དམངས་ཀྱི་ཐོབ་ཐང་གླིང་བའི་མཚམས་ཤིག་ན།།
ཁྲིམས་ཀྱིས་རྩ་དོན་རྩོད་པའི་མཁས་དབང་ཞིག།།
མཆོག་གསུམ་རྒྱལ་བ་རྒྱ་མཚོའི་བྱིན་རླབས་གཅིག།།
ལས་འབྲས་རྟེན་འབྲེལ་བསླུ་བ་མེད་པ་གཉིས།།
གངས་ཕྲུཊ་ཁྱེད་ཀྱི་ལྷག་བསམ་གཙང་མས་མཐུས།།
བསིལ་ལྡན་སྐྱེ་འགྲོའི་བདེ་དོན་མྱུར་འགྲུབ་ཤོཊ།།
No comments:
Post a Comment